Antwerps liedboek
(2001)–Anoniem Antwerps liedboek–
Auteursrechtelijk beschermd
[Folio 73v]
| |
1
O Lacen hoe macht wezen
dat ic so truerich ben
Ic had een wtgelesen
Si staet so vast in mijnen sin.
Ic drage dat lijden verborghen
Int ionghe herte mijn
Van tsauonts totten morgen.
Het en mach niet anders zijn
2
Ic heb die alderliefste
dats eenen brief ghesant
Hi hielt van trouwer liefden
Hi is mi wel becant
Den brief heeft si ghereten.
Ick scriuer haer nemmermeer geen
Adieu mijn alderliefste
Ic en sie v nemmermeer
3
Den brief heef si gereten
die stricken heeft si ontdaen
Si heef mijn herte beuanghen
Ic en can haer niet ontgaen. |
Ic sal haer duecht bewijsen
Waer dat ic can oft mach
Ic gonne die alderliefste
Veel duysent goeder nacht.
4
Gheselle laet v gedencken
Valt v een vrouwe so hert
menich hase wert gewencket
Die noyt geuangen en wert.
En condise niet achterlopen
So volcht haestelijc na
Door haghen ende door straten.
die liefde die is onderdaen.
5
Gheselle wel lieue geselle
leeft voort op goeden troost.
Hi leyt dicwils geuanghen
die namaels wort verlost.
Ic wil mi gaen verhueghen
Vaert wech mijnder herten pijn
Het is in haer vermoghen.
Het mach noch anders zijn |
6
Adieu mach ic wel scriuen
Adieu is mijn deuijs.
Ic hope noch troost te crigen
Mijn lief gheue ic den prijs
Ic sal haer soetelic volghen
Si en mach mi niet ontgaen
Adieu mijn alderliefste lief.
Ghi hout mijn herte geuaen
|
|