Antwerps liedboek(2001)–Anoniem Antwerps liedboek– Auteursrechtelijk beschermd Vorige Volgende 95 Een nyeu liedeken. 1 INt soetste vanden meye Al daer ic quam gegaen So diep in een valleye daer schoon bloemkens staen 2 Die mey stont int saysoene. Verchiert aen elcken cant Ic hadde genoech te doene Want ick mijn lief daer vant 3 Ic vantse daer alleyne Si bant haer gheluwe hayr Bi een claer fonteyne dus quam ick al neuen haer 4 Als si mi wert gheware So seere dat si verschoot Doen quam int openbaer Haer liefde die si mi boot [Folio 55r] [fol. 55r] 5 Ic groetse vriendelijcke Ic boot haer goeden dach. Doen dede si mi des gelijcke. die mi troost gheuen mach 6 Schoon lief om een bede dwelc reyn liefde prijst Dat ghi gheen dorperhede Mijn lichaem en bewijst 7 En wilter niet af spreken Want v sal niet misschien ter doot toe soude ict wreken Saghe ick v onghelijc bien. 8 Schoon lief tot uwer scaden. Hebdy mi geuonden hier Wi twee wi zijn verraden Ons vianden comen hier 9 Al wt mijns vaders houe Dat vol verraders staet Maria tot uwen loue Wilt ons nv gheuen raet | 10 Den raet die ic sal vinden En is te mael niet goet Ic moet mijn leuen eynden Ende storten mijn roode bloet. 11 Schoon lief om uwen wille. So wil ick steruen den doot die verraders swijghen stile Si zijn mijn ouerhoot 12 Ick wilse gaen bestormen Ende maken groot geschal Mijn lichaem hoort den wormen Dwelc ic hem gheuen sal. 13 Men gincker stormen ende strien haer lief die bleef daer doot Waer sal ic nv gaen oft rijen Noyt vrou in meerder noot 14 Si was van rou ghestoruen Wanneer si sach zijn bloet. Die strenge doot verworuen Door grooten teghenspoet | 15 Die dit liedeken dichte Is dicwils sonder ghelt dat doet hem een zijn nichte Die hem te voren telt. Vorige Volgende
Auteursrechtelijk beschermd Auteursrechtelijk beschermd Auteursrechtelijk beschermd
Auteursrechtelijk beschermd
Auteursrechtelijk beschermd