Amsterdams minne-beekje. Deel 1

[p. 138]

Wat maeckt ghy Venus spruyt?

Stemme: Verheft u diep gesucht, &c.

WAt maeckt ghy Venus spruyt?
Wat maeckt ghy kleyne guyt?
Wat maeckt ghy doch in my, die niet van 't minnen houw
Om dat ick niet en vind' getrouwheyt in Mevrouw.

2 't Scheen eertijts wel te zijn

Of sy haer gunst tot mijn
Alleenigh stellen wou, maer ach nu ick begin
Te vryen met het hert, ist maer beveynsde min.

3 Wegh, wegh, Cupido wegh,

Gedoogh niet dat ick legh
Gevangen en geboeyt in liefdens slaverny,
Al wat mijn Juffrou doet, is niet dan veynsery.

4 Schoon sy my kusjes jont,

En dat haer lieve mont
Mijn vriendelijck toelacht, en minne teeckens toont,
Ten is maer veynsery, die in mijn Juffrou woont.

5 Of sy my gunste biet,

[p. 139]

 

Haer hert en meent het niet,

 

Dies gaet het nu met my, gelijckerwijs het doet

 

Als eener die bedeckt het bitter nut met soet.

 

6 t Soet dat sy toont aen mijn

 

Is soetheyt inde schijn:

 

Maer bitter inder daet, dies ick de min veracht,

 

Wegh, wegh, Cupido wegh, vertreckt uyt mijn gedacht.

E. C.