Amoreuse liedekens

Een oudt Liedeken.
[Ick peyns om een persoone]

ICk peyns op een persoone
Nacht ende dach soo zwaer,
Want daer en is gheen schoonder
In mijnen sin voorwaer
Ick wou dat ick altijt by haer waer, &c.
Dat ick by haer niet wesen en mach
Elck uyr dunckt my een jaer.

Niemant mach ick claghen

Dan alleen die ooghen mijn
In mijn hert moet ick draghen
Dit bitter lijden pijn,
Schoone woorden verleende sy mijn, etc.
Maer nu sy weet al mijn secreet
Nu laet sy my in pijn

Het is onlangs gheleden

Dat ickse laestmael sach,
Doen was ick wel te vreden
Nu treur ik met geclach,
Ick can niet langher wederstaen, Ick, etc.
O lijden groot o bittere doot
Ick en can niet ontgaen.

Schoon lief ghedenckt mijn pijne

Dat ick heel desolaet
Van u absent moet zijne
Troost my eert valt te laet
Mijn herteken leyt in desperaet, mijn, etc.
Ick waer verheucht, schoon liefste jeucht
Soo ghy my quaemt te baet.

'Tis pijn al boven maten

Nu ghy die oorsaeck zijt,
Dat ick u lief moet laten
En blijven int verdriet,
'Tis onghelijck hoort mijn bediet, Tis, etc.
Ick peyns en ly, ghy zijt party
Van t'gheen dat my gheschiet.

[p. 36]

 

Adieu Prince bloeme

 

Adieu diet hert verheucht

 

Adieu lief hout u vrome

 

Adieu mijns herten geneucht, &c.

 

Adieu Ionckvrou, ick blijf ghetrou

 

Peynst om my als ghy meucht.