Amoreuse liedekens
(na 1613)–Anoniem Amoreuse liedekens–
Auteursrechtvrij
[pagina 34]
| |
Vrou Venus Camenieren
Helpt my uyt desen noot,
'tSweert van Piramus bloot
Heeft mijn jonck hert door houwen
My dunckt ick sterf de doot
Al door die lust van Vrouwen.
Mijn lief heeft mijn bedroghen
Al met haer woorden licht
Cupido spant die boghen
Al met u stralent schicht,
Want haer amoreus ghesicht
Door straelt mijn hert van binnen
Haest u wel Venus nicht
Oft ick moet heel ontsinnen.
Mach ick geen troost verwerven
Vant vrouwelijcke graen
Den doot die moet ick sterven
Soo Piramus heeft ghedaen,
Thisbe was seer belaen
Al om haer lief te spreken
Ter fonteyne is sy ghegaen
Al daer hy lach doorsteken.
In alsulcken zwaer ellende
Ben ick om u mijn lief
Waer ick my keer of wende
Nijders die doen my grief,
Laest schreef ick haer een brief
Met woorden seer ootmoedich
Daer in dat ick haer schreef
Mijn liefde overvloedich.
Had ick den appel schoone
Van Paris excellent
Ick gafse mijn lief ydoone
Voor een waerdich present,
Mocht ick haer comen ontrent
Soo waer ick heel genesen
Reyn bloemken eloquent
Laet my u dienaer wesen.
Al zijt ghy rijck van goede
Ende ick een arm minnaer
Lief zijt niet groot van moede
Maer zijt mijn wederpaer,
Want hooghe berghen voorwaer
Sietmen dickwils dalen,
Dus schoon liefken eerbaer
Troost my al sonder falen.
| |
[pagina 35]
| |
Oorlof ghy jonghe ghesellen
Bemint ghy een Venus dier
Wilt niet soo vierich minnen
Of ghy comt in dangier
Want Cupido stoockt het vyer
By nacht en oock by daghen
Dus minnaers goedertier
Wilt doch reyne liefde draghen.
|
|