Amoreuse liedekens

(na 1613)–Anoniem Amoreuse liedekens– rechtenstatus


Een oudt Liedeken. [Met Venus strael ben ick gerocht, MEt Venus strael ben ick gerocht, Sy heeft my 't herte wel doorschoten, Die my dat Mutsken heeft aengeknocht Daer stont ick in gesloten, Met Vrou Venus douwen overgoten. Met Venus douwen ben ick bespoeyt, Al met sint Ioris gheleyt, Dat elck bloemken schoon en lustigh bloeyt Wil ick my gaen vermeyen, Ia daer alle de wilde Vogelkens schreyen. Maer Nachtegael cleyn Vogelkijn Wildy my een Liedeken helpen zinghen, Van minnen voor mijns Liefs vensterkijn, Dat zy uyt haren slaep mach ontspringen. En zy hief op een Liedt en zanck Met also soete tale, Den voys voor zijn liefs vensterken klanck Gelijck als de Nachtegale, Want hy was geraeckt met Venus strale. Als mijn lief hoorde des Vogels geluyt, Daer zy te bedde was gelegen, Sy stack haer hooft ten vensteren uyt, Sy heeft my troost gegeven, Gelijc als Venus dienaers te hebben plegen. Sy seyde: zijt wellecom soete lief, Die mijn herteken houd in wake, Qua tongen doen ons beyden gerief, De Nijders gaen achter straten, Ick en sal u lief voorwaer niet laten. Nu dancke ick den Heere excellent
[pagina 139]
Dat ick mijn lief dus mach aenschouwen, Ende bidde den Heere omnipotent, Dat ickse mach behouwen, Want zy is de bloeme boven alle vrouwen. Die ons dit Liedekens heeft gestelt, Die was van Venus bende, Hy heeft zijn goed en oock zijn gelt Verteert tot eenen ende, Sijnen Geest die sal hy God toesenden.