Amoreuse liedekens
(na 1613)–Anoniem Amoreuse liedekens–
AuteursrechtvrijOp de wijse: Cupido triumphant.
SChoon liefjen seer playsant
Boven alle schat ende juweelen
Ghy staet int hert gheplant
Ick en cant niet lagher heelen
V schoonheyt menighfout
Prijs ick boven alle gout
Nochtans cont ghy soet my payen
Met uwe soete wesen,
En mijn gheest verfreyen
Veranderen al mijn vresen
| |
[pagina 122]
| |
Verlichten mijn torment,
Dat ick u mocht zijn present
Altoos u dienaer obedient.
Dan ick vind' my eylacy
Soo deerlijck bedrogen,
Om dat ghy mijn lamentacy,
Niet langher wilt ghedoghen,
Mijn tijt is ghepasseert
Met een ander ghetriumpheert
Hoe bent ghy dus haest verkeert.
Nu mach ick mijn misval
Met recht wel beclaghen,
Dat ick uyt liefden ghetal
Dus schendich ben verjaghen,
Eens waer ick int herte dijn
Nu moet ick u aenschijn
Derven met alsoo grooten pijn.
Mocht ick doch van u weten
Reyn Beelt om wat oorsaken
Dat ick worde vergheten
Ghy staet my niet meer ter spraken,
Ghy ghelooft qua tonghen fel
Die my doen lasteren snel
En maken u sinnekens rebel.
Maer valsche nijders quaet
En wilt schoon lief niet achten,
Want sy sayen altijt haer saet
En doen so menich versmachten,
Troostbarich my doch weest
Mijn wonden nu gheneest,
Verlost my uyt dit tempeest.
Princesse lief verheven
Toont my u vrolijck herte,
Op u rust moet ick leven
Blust al mijn bitter smerte,
Mijn druck met vlijt aenhoort
Of ick blijf gants vermoort
Gheeft my een troostelijck woort.
|
|