Amoreuse liedekens
(na 1613)–Anoniem Amoreuse liedekens–
AuteursrechtvrijOp de wijse: Het leerde een aerdich Maechdelijn op eenen stonde.
SChoon liefken jent, seer excellent
Ick moet u claghen,
Dat ick absent
Van u dus blijf ghewent
Dus lijdt mijn hert torment
Van daghe te daghen.
Hoe dickwils hebben wy met alle melody
Gheneuchte bedreven,
Mijn hert was bly
Als ick mocht comen by,
| |
[pagina 120]
| |
Schoon Liefken aen u sy
Door u soet aencleven.
Al waer ick quaet, haer fiere gelaet
Cant al ghenesen,
Mijn hart dat vaet
Al waert in desperaet
Al door u soete praet
Als ghy hebt bewesen.
Ick roep o wach, nacht ende dach
Dat ickse moet derven,
Die ick aensach,
Dickwils met soet gheclach
Niet langer spreken en mach,
Ick salt besterven.
Waerom lief reyn, soet edel greyn
Niet en hebt ontfanghen,
Mijn trou alleyn
Die ick u boot pleyn
Wt liefden heel ghemeyn,
Hebt laten verganghen.
Dat ick niet meer, mach comen weer
Dat doen qua tonghen,
Dus ick verteer
Mijn hert in lijden seer
Sy houden my ter neer
Als een Kindeken bedwonghen.
Princesse confoort, weest niet verstoort,
Wilt u doch keeren
Nae 't soet accoort
Schoon liefken u doch spoort
Onthout van my dit woort
Met deuchden ende eeren.
|
|