Amoreuse liedekens

Een oudt Liedeken,
[Reyn Bloemken excellent]

Op de wijse: Madame de Tempies.

REyn Bloemken excellent
Nae u staen al mijn sinnen
Ick leef in swaer torment
Al door den brant der minnen,
Dus roep ick om baet
Schoon bloemken delicaet
Aen u alleyn mijn troost en staet.

U lieflijck aenschijn claer

Heeft mijn jonck hert doorschoten
Met reynder liefden eerbaer
Soo dickwils overgoten,
Na dien ick dach ende nacht
Lief troost van u verwacht
Het staet alleen in uwer macht.

Maer als ghy u bereyt

Met Vrienden ende met Magen
Soo moet ick ongepeyt
Blijven t' allen daghen,
Want ick en ware noyt
Als hy o edel Roosken root.

Dus roep ick wederom

En stel mijn hert te vreden,
Men soeckt nu al rijckdom
Al voor gestradicheden,
Oock seytmen int gemeyn,
Vrouwen herte is gheen steyn,
Maer het wort wel verwonnen met liefde reyn.

Den brant wert ons geblust

Al door dit heymlijck lijden,
Door hope die my versust
Dat ghy my sout verblijden,
Maer lief ghy beyt te lanck
Dus blijft ick even cranck
Al door den troosteloosen dranck.

Nochtans weet ick gheen saeck

Daer ghy my om sout verlaten,
Want met u hielt ick spraeck
Op weghen ende op straten,

[p. 119]

 

Ende ick oock niet en weet

 

Dat ick u dede leet

 

Int openbaer of int secreet.

 

Weest ghenadich liefste greyn

 

En laet my troost verwerven

 

En ick door liefden certeyn,

 

Voor u oock soude sterven,

 

Want ick anders niet,

 

Als trou en eere riet,

 

Waerom laet ghy my langher int verdriet.

 

Qua Clappers tonghen quaet

 

Connen tweedracht op rueren,

 

Daer door comt haer haet

 

Ick hoop ten sal niet dueren,

 

Want dat Godt den Heer,

 

Versaemt tot prijs en eer

 

En sullen geen Clappers omstoten weer,

 

Neemt ghy nu lief de vlucht

 

En u van hier gaet cloecken,

 

Want sy door quaet gherucht

 

Niet als tweedracht gaen soecken,

 

Seght my wat is het s'werelts goet

 

Wat gheneuchte dat het doet

 

Als daer niet is reyn Liefde soet.

 

 

 

Prince.

 

Princesse lief hoe 't staet

 

Wilt my doch eens ontladen,

 

Want ick my tot u verlaet

 

Schoon lief op u ghenade,

 

Of ick moet lief de doot

 

Sterven uyt liefde groot,

 

Laet ghy my langher in desen noot.