Amoreuse liedekens

Een oudt Liedeken.
[Ick segh Adieu, wy twee moeten scheyden]

ICk segh Adieu, wy twee moeten scheyden
Tot op een nieu,
Soo sal ick troost verbeyden,
Ick late by u dat herte mijn,
Want daer ghy zijt daer sal ick zijn,
'tZy vreught of pijn,
Altoos sal ick u vry eygen zijn.

Mijns sins ghequel

Dat doet my dickwils treuren
Haer liefde rebel
Die doet my 't herte scheuren,
'tScheyden van my doet u de noot,
Ick blijf ghewont ick seght u bloot
Schoon Bloeme minjoot
Ick blijf ghetrou tot inder doot.

Ick dancke u Lief,

Reyn minnelijck Lief ghepresen,
Voor alle gerief
Soo wilt my doch ghenesen,
Dese nijders fel met haer fenijn
Sy hebben belet ons blijde aenschijn
Op dit termijn
Alsoo sal ick u vry eyghen zijn.

Mijn hoop is troost

Fortuyne sal noch keeren,
Lief op my ghelooft
Soo sal mijn vreught vermeeren,
Al moet ick derven mijn conroot,
Ende blijven in dit lijden groot,
Swaerder dan loot,
V eygen blijve ick tot inder doot.

Adieu van my, soo zijt ghy nu gescheyden

Een ander niet dy
Sal nu gaen vermeyden,
Couragieus gelijck d'Everzwijn,

[p. 91]

 

Een amoreus Crancelijn

 

Sult ghy draghen fijn,

 

Altijt sal ick u vry eygen zijn.

 

Adieu schoone Stadt,

 

Adieu Prieel vol vreughden,

 

Reyn Maeghdeken vat

 

Daer wy t'samen verheughde,

 

Gedenckt den troost die ghy ons doet,

 

Ghy zijt mijn Lief die ick noyt en vloot,

 

Ic seg u bloot, u eygen blijve ic tot inde doot.