Amoreuse liedekens
(na 1613)–Anoniem Amoreuse liedekens–
Auteursrechtvrij
[pagina 89]
| |
ICk hadde een ghestadigh minneken
Geen schoonder die daer leeft,
Verkooren in mijn sinneken
Van rouwe mijn herte beeft,
Want sy my nu begeeft,
Daerom mach ick wel schrijven
Wantrou van alle wijven
Want sy een ander heeft.
Twee bruyn ooghen soo draecht sy
Soo vriendelijck int gesicht,
Daer mede soo verjaecht sy
Druck lijden int gewicht,
'tIs langhe te voren gedicht,
'tIs langhe te voren gheschreven
Dat sy my soude begeven
Want vrouwen woorden die zijn licht.
Soete weerde Lieveken
Peynst somtijts eens om my,
Doet vry al u gerieveken
Al sonder fantasy,
Seer selden ben ick bly,
Wanneer ick eete of drincke
Om u ist dat ick dincke,
Al wijsdy my nu voorby.
Hoe soude ick 't vergeten
Ick ligge in swaer verdriet,
Van drincken noch van eten
Kan ick ghevoeden niet,
Ick weet wel hoe sy hiet
Die mijn herteken heeft bevanghen,
Nae haer staet alle mijn verlanghen,
Ick leve in swaer verdriet.
O Venus soete vrouwe
Is dat u dienaers loon,
In 't eynde van u trouwe,
Soo ist beginsel schoon,
Dies sterf ick duysent doon,
Dan haar een ander sal trouwen
Al onder des Hemels Throon.
Adieu mach ick wel schrijven,
Adieu is mijn advijs,
Bedroghen moet ick blijven
Als Salomon de wijs,
De schoonheyt van Parijs,
Absalon de schoone,
Schoone vrouwen spannen de Kroone,
| |
[pagina 90]
| |
Die geve ick den hooghsten prijs.
O bitterlijcke scheyden
Waer toe zijt ghy ghemaeckt,
De doot wil ick verbeyden,
Die alsoo bitter smaeckt,
Het moet ghescheyden zijn,
Schoon Lief komt my ter spraken,
Ick val in desperaten,
Ick blijve al inde pijn.
|
|