Amoreuse liedekens

[p. 59]

[God heeft u gegeven reden en sin]

God heeft u gegeven reden en sin,
Om my, dien tot sonden genegen bin
Dat ghy my sout regeeren.

De Ziele sprack: Mocht my dat gebeuren

Dat ick mocht sterven gelijck als ghy,
Soo soude ick leven sonder treuren,
Maer als ick voor 't oordeel Godts sal staen,
Ende nae wercken loon ontfaen,
Soo moet ick 't al besueren.

't Lichaem sprac: Als ghy dat weet te voren

Soo wie hem selven al willens wout,
Oft treet in eenen dooren,
Wie sal hem beklagen dat vraegh ick dy?
Ghy moet oock sorgen voor my
Of wy blijven beyde verlooren.

De Ziele sprack: Lichaem ghy moet wel sorgen

Want als komt aen de bitter doot
Wie sal ons dan verborgen,
Dus moet ghy sorgen het is noot,
Dat ghy niet verliest de blijtschap groot,
Ghy hebt noch geenen morgen.

't Lichaem sprac: Moet ic ooc sterven leeren

Ende ick weet doch geenen tijdt,
Waer sal ick mijn keeren,
[Die} werelt toont mijn vrolickheyt,
[Natuere} is daer toe bereyt,
[Hoe] sal ickse mogen verheeren.

De Ziele sprac: o lichaem mijn van waerden

Waer op soo verlaet ghy u,
Wat wildy hier aenvaerden,
Hoe dorfdy bedrijven eenigh solaes,
Arm stinckende vleesch der Wormen aes,
Ghy moet doch inder aerden.

't Lichaem sprac: Moet ic inder aerden lijden

Och Heere God van Hemelrijck,
Hoe mach ick mijn verblijden
Dat ick men inder sonden staet,
Mijn rout soo seer mijn leven quaet
Ick wel leeren lijden.

De Ziele sprac: wildy u tot deuchden geven

Soo sullen wy, ick ende ghy
By Iesum zijn verheven,
Daer blijdtschap sal wesen immermeer,
Ende zijn verlost uyt den eeuwigen seer
Daermen eeuwelijck sal leven.

't Lichaem sprac: ontfermt God onser beyden

[p. 60]

 

My ende die edel Ziele mijn

 

Ende wilt ons doch gheleyden,

 

Wilt doch bewaren die edel Ziele van my,

 

Maeckt dat ons leven u behaeghlijck zy

 

Wanneer wy moeten scheyden.