Amoreuse liedekens

Een out Liedeken.
[En ist niet wel ghekermt gheklaecht]

EN ist niet wel ghekermt gheklaecht
Ons proper Dochter in is geen maecht,
Men doeter niet dan schreyen,
Sy was niet gherust voor sy Kindt draecht
Vande Hoender Vlaeykens was sy vertsaecht.
Sy en wilde niet langer beyen,
Sy sit geerne ghesetelt by
Neffens den Man
Als nu als dan
Sy plach te segghen ghy bevetelt my,
Nu seyt sy niet dan ketelt my
Ick en hebber maer een baeyken an.

Als de Moeder dat vernam

Sy waechde haer met moede gram
Hoe dorst ghyt avontueren,
Moerken als ick al op de steygher klam
In beyde zijn Armkens dat hy my nam
En ick liet al ghebeuren
Hy viel te my seer milde // fijn
Zijt sonder vaer
Maeckt gheen misbaer
Wat hy my dede de gilde // mijn
Deerdet my mocht ick stille // zijn
Ten schilde mijn Moexken niet een haer.

Princesse Moexken maeckt eenen geest,

Al staet mijn Buycxken op den leest
Wy sullen oock vreucht bedrijven,
Waer door zijdy soo bevreest
Die Wereldt moet zijn vermeest
Gheen Maecht en wilde ick blijven
Laet uwen rouwe dus varen snel
Zijt doch kontent
Hier mede een ent
Al en mocht ghy die Werelt niet vermeerderen
Laet ons doch bedrijven sulcken speel
Mijn soete Lief ende ick seer excellent.