Die hystorie dat leuen ende dat regiment des alre grootsten ende machtichsten conincx Alexander die heere ende prince was van alle die werelt
(1491)–Anoniem Die hystorie vanden grooten Coninck Alexander–
Auteursrechtvrij
[Folio i4r]
| |
mit ons soe sterf dese grote Alexander doe hij in sijn xxxiij. iaer was Hi was die meeste van moede ende van herten die nye in die werelt quam Hi was oec die machtichste man die nye in die werelt regneerde Hi verloste altijt sijn ridders wt haren noot dat sij mit sinen troeste soe stout waren dat hem dochte al hadden sij alle naect gheweest. hem en hadde niet mogen deren als sij hem sagen Hem en geuiel oec nye dat hi enigen man bestont hi en verwan hem. noch nye en bestont hi borch noch stat hoe vaste dat sy waren: hi en wanse of hadse tot sinen wille Nye en quam oec volck tegen hem te stride hi en verwanse Mer int eynde wort hi selue verwonnen. maer niet mit geuechte mer mit verraderie van sinen dienres die alsoe deerlic vergauen mit fenijn Men leest dat hi enen steen hadde soe wyse die steen droech dat hem gheen fenijn deren en mochte Mer daer hi aldus verraden was so was hem des nachts den steen benomen om dat den moort voldaen soude worden ende verholen bliuen Mer alst fenijn in die aderen getogen was alsoe dattet die natuere niet en conste gelosen soe wort hem sinen steen weder gegeuen al heymelic Ende aldus verghinc die auenture mit hem Als die mare te Babilonien quam dat Alexander gestoruen was in die bloeme sijnre ioecht ende int meeste van sijnre cracht so wort die stat zeer droeuich | |
[Folio i4v]
| |
Maer die luden die hij verwonnen hadde en wouden dat niet gelouen dat hi doot soude wesen: want sij meenden dat hi nimmermeer en soude mogen steruen Sonderlinghe om dat si ghesien hadden dat hi in groter auenturen dicwijls verlost worde vander doot Maer doen sij wel die waerheit wisten dat hi sekere doot was soe beweenden sij hem harde zeere Als Roaxanes Darius dochter Alexanders wijf vernam dat Alexander haer heere doot was. soe hadde sy daer of soe groten rouwe. dat sy daer nae nye en at Maer Alexanders magen wt gryeken en hadden gheenen rouwe om hem niet meer dan oft haer vyant geweest hadde: Roaxanes Darius dochter alexanders wijf dede haer gespelinnen doden om dat sy haer an laghen ende rieden dat sy eenen anderen man nemen soude: |
|