Die hystorie dat leuen ende dat regiment des alre grootsten ende machtichsten conincx Alexander die heere ende prince was van alle die werelt

Van Alexanders begrauinghe: Cap lxvij

[M]En maecte in Babilonien groot geclach ende hant gheslach van rouwen Maer ick segghe ouer waer dat die dode menschen gheen vrienden en hebben. want datmen daerwaert dient dat is al om ghewin. want anden doden en leyt nyemant ende elck doets hem eerst of also hi eerst mach Die na Alexander bleuen die bedreuen haer dinc alsoe dat al gemeenlic rijck bleuen Maer daer was ghestrijt een wile om sijn

[fol. i5r]

sepulture Die van Gryeken wilden hem ter stont ueruoeren tot haren lande waert Mer si droeghen ouer een datmen Iupiter vraghen soude waermen hem grauen soude Iupiter antwoorde datmen alexander grauen soude in Alexandrien in die groote stadt die hi seluer dede maken in Egipten Dit seide doe Iupiter. ende men dede daer een schoon costelic graf maken Ende Ptholomeus die nae hem coninc bleef dede hem daer zeer rijckelick begrauen. alsoet alsulcken heere ende coninck wel betamelic was: In Alexanders tijden en vantmen ghenen alsoe wijsen coninc als hi was. hadde hi hem konnen wachten van veel wijns te drincken: ende hadde dese grote heere hem konnen houden also gemaetich in sijn manieren in sijnre groter rijcheyt als hi dede doe hi arm was. Inder noot en konste hem nyemant bet beuroeden dan hi maer in sijnre weelden was hi zeer sot: want hi wilde god gehieten wesen Ende altijts hadde hi tot sinen raede seuen wijse mannen: want dat beual hem die groote philosophe Aristoteles sijn lieue meester Maer als hem yet swaers aen quam soe nam hi elcken van desen wijsen mannen alleen ende hi seide hem sijn dingen ende ghebreck altemael: ende dan soe vraechde hi hem sijnen raet. Ende aldus onthieldt hi wel wat hem elcke man riet. ende ten laetsten nam hi ende

[fol. i5v]

schiep hi wt alle desen den besten raet in hem seluen alsoe hi best conste ghemercken Ende dan auentuerde hi den raet Aldus soe wort al niet sijn dinghen die alsoe sterck soe rijck so machtich was. want hi moeste steruen. Ende hi bleef doot soe voor gheseit is God verleene ons na onsen doot dat eewighe leuen ende die grote blijscappe sonder eynde: Amen:

Hier eyndt dat regiment ende dat leuen van den groten ende moghenden coninc Alexander die een heere was van alle die werelt