Die hystorie dat leuen ende dat regiment des alre grootsten ende machtichsten conincx Alexander die heere ende prince was van alle die werelt

Van Alexanders doot Ca lxv.

[A]Lexander dede hem dragen in een hoghe stat daer hem al sijn volck mochte syen liggen in groter pijnen Ende hi lietse alle tot hem comen ende hi beual datmen nyemant verbieden en soude die daer comen wilde. Ende daer quam tot hem menich stout riddere die zeer screyden ende groot misbaer maecten Hier nae badt Alexander sijn vrienden. als hi doot ware datmen hem mit duerbaren specien ende balsamen begrauen soude Ende datmen hem voeren soude nergens dan in Lybia in Amons sijns vrients schonen tempel daer hi gecroent staet Doe vraechdenhem sijne vrienden om dat sij sagen dat hi soe cranc was: wye hi wilde dat nae hem sijn crone draghen

[fol. i3v]

soude van sijnen rijcke Hi seide die beste Maer hi en noemde nyemant. noch Hercules sinen zone noch sinen broeder: noch oec dat kint dat Roexanes droech die doe swaer ghinc bi hem mit kinde Want alexander dachtet ouer dat hi die soe groten heer was van enighen man soe groten rijcken heer maken soude hi en waert waerdich want hi hads onwaert sulck goet te laten enighen man dies niet waerdich en waere. Ten lesten daghe ontuiel hem sijn sprake ende doe nam hi sijn vingerlinc ende stact een vanden iongelingen an sijn hant Doe meenden veel heren die daer waren dat alexander wilde dat hi coninck nae hem wesen soude Scolastica historia seit dat alexanders suster hem fenijn gaf: om dat sy hoepte eenen groten heer te crigen ende vrouwe te wesen van alle sijn rijck Ende alsoe haest als hi dat fenijn int lijf hadde dat hi doe sijn sprake verloes Ende om dat hi wilde dat nemmermeer also groten heere nae hem wesen en soude in aertrike als hi doen was. soe screef hi sinen laetsten wille ende deelde sijn rijck in twalef deelen ende hi gaft twalef van sinen gesellen die mit hem op geuoet waren. ende dien gaf hi elck een deel van sinen rijcke: Maer die vier verdreuen alle die andere ende bleuen daer heeren of.