Die hystorie dat leuen ende dat regiment des alre grootsten ende machtichsten conincx Alexander die heere ende prince was van alle die werelt
(1491)–Anoniem Die hystorie vanden grooten Coninck Alexander–
Auteursrechtvrij
[Folio i2v]
| |
[T]Hessales die node alexander ende sijn gheselscap mit hem ten eten in die stat ende daer maecte hi hem feeste bouen alle feesten ende hi gaf daer die meeste ende die costelicste gerechten diemen vinden mochte Ende Yollas ende Philippus sijn broeder schencten voorden coninc: endesij waren wel voersien hoe si alexander souden vergeuen. want haer vader hadt hem geseyt Doe sy sagen dat Alexander genoech ghedroncken hadde. soe schencte die een ende die ander proefde den dranc daer noch gheen fenijn in en was mer daer nae deden sy fonteyn water inden wijn daer dat fenijn in gemenget was Ende doe gaf men denconinc den nappe ende hi dranc: mer int middel van sinen toghe soe ontfinc hi binnen eenen anxtelicken steke daer hi zeer of veruaert wort Want het ghinc hem in sijn lijf oft hi mit een knyf gesteken had geweest: ende Alexander riep mit groot misbaer Ende sijn vrienden meenden dat hijt wt dronckenscap dede ende sij bleuen in dat meenen: maer het was een quade moort. Doe badt alexander datmen hem wech droeghe ende daermen hem wech droech. so was hi half doot Want hi wort van binnen also gepinicht dat hi dicwijl een swaert eyschte om hem seluen doot te steken ende om sijn pine te corten Want sijn vrienden die ontrent hem stonden ende haer handen aen hem deden om hem te helpen soe | |
[Folio i3r]
| |
docht hem dat sij hem zeere deden als of sij hem ghewont hadden: want corts te voren daer hi lach en sliep hadde hem dit al wel ghedroemt. Opten vierden dach sach hi wel dat hi steruen moeste: Ende hi seide Nv ken ic mijn geual want al mijn geslachte dat van Achilles gecomen is dat is al gestoruen ontrent sijn xxx. iaeren mit groten euelen Sijn ridders seiden dat hi verraden was. ende sij riepen alte iammerlicke lude Aylaes wye heuet ons mit soe groten moort beroeft van onsen coninc Ende die dit geselscap ghescoert heeft die sal menigen man sijn leuen benemen: want des ghelijcx en wort nye ghesien of geuonden |
|
