Die hystorie dat leuen ende dat regiment des alre grootsten ende machtichsten conincx Alexander die heere ende prince was van alle die werelt

Van Alexanders feest ende sijn vermeten Ca. lxiij

[E]Er Antipater quam so voer alexander binnen ende buten soe hi wilde ende hi was wel te vreden Mer hem ontstarf Ensistien die hi bouen alle sijn princen zeer beminnede: want het was een die schoonste iongelinc diemen in al die werelt vandt Ende Alexander weende lange daer om ende hi dede hem een costelic graf maken daer hi veel scats an leyde. want het coste hem te maken xij.M: talenten gouts. Oeck dede alexander gebieden datmen desen iongelinc anbeden soude als een god ende daer voor houden Als dese iongelinc begrauen was soe keerde Alexander weder in Babilonien ende daer lach hi stille ende hildt grote feeste. ende daer ontfinc hi nacht

[fol. i1v]

ende dach die slotelen ende die presenten die hem quamen wt alle landen Mer om dat die van Romen hem nv gheen present en senden soe swoer hi dat hi Romen destrueren soude Ende om dat hi alle die werelt tonder hadde soe wilde hi voorder oerloghen dan een mensche toe behoort. ende hi seyde sinen luden dat sij sinen raet doen wilden hi soude hem doen weten ende hebben die heymelicheit der naturen Ende hi dede noch meer scepen maken ende hi voer in die diepe doncker zee om der naturen cracht te dwingen Des balch haer die nature ende die vier elementen mede die altijt mit hem geweest hadde. want die nature was haer vrouwe Doe voer die natuere ter hellen om hulpe te soecken dat sy Alexander ter doot brengen mochte. ende sy vant daer hulpe ende raet want alexander wort wter zee te lande ghesteken ende quam weder in Babilonien Antipater was doe oec gecomen in Babilonien: ende hi hadde drie zonen Die eerste hiet Casander. die ander Philippus ende die derde Yollas Dese waren bij Alexander onthouden om dat die een altijt den dranc proefde eer datten alexander dranc: ende als hijen dan geproeft had soe ontfinc alexander den nap ende dranc selue Nu had Antipater doen maken so stercken fenijn. dat hi wel seker was hads alexander yet int lijf dat hi steruen moeste Want dit fenijn was also sterck datmen niet

[fol. i2r]

houden en mochte in vaten van siluer of van goude noch van yser of van metael noch in gheen vat: sonder in een hoeue van een paert Antipater was oeck soe seker dat alexander daer of steruensoude dat hi seide tot Casander sinen zone dat hi dat rijck van Macedonien behouden soude