Die hystorie dat leuen ende dat regiment des alre grootsten ende machtichsten conincx Alexander die heere ende prince was van alle die werelt

Hoe Alexander te Babilonien quam tot sijnre doot waert. Cap. lxij.

[A]Ls alexander bi Babilonien quam soe hiet hem een waersegger dat hi inder stat niet en ghinge: want sijn leuen lach daer an Hier om liet alexander die stat staen ende hi voer ouer in een stat gehieten Bursia daer doe nyemant in en woende Een van alexanders vrienden die Amoxarcus hiet die seide hem datmen gheen waerseggers gelouen en soude want sij plegen veel te lieghen Om dese woorden soe voer alexander te Babilonien binnen Doe seide Corbanes die waerseggher Gheen argher dinc en is aenden

[fol. h6v]

mensche dan dat een mensche plomper is om te doen sijns selfs oerbaer dan eens anders Als Alexander binnen die stat quam soe settemen hem een crone op sijn hooft gemaect van yuore ende goude Ende Porrius leyde hem an die een syde ende Darius broeder an die ander syde. Ende als hi te rechte geseten was so quam groot volc voor hem ende clageden hem ouer sijn rechters. ende si vraechden hem oft sinen wille was datmense soe iammerlic tonder dede Als alexander dit hoorde soe dede hij alle sijn rechters doden voor die boden ogen. ende hier na nam hi Roaxanes Darius dochter te wijue: Ende hi hiet den Gryeken dat sij nemen souden vanden schoonsten ende edelste maechden die hem best behaechden vanden ghenen die si wt alle landen gebrocht hadden Hier na vergaderde hi alle dat ridderscap ende goedese rijckelick ende hi gaf hem groot goet alsoet elck begheerde: Ende die oude ridders liet hi vry van oerloghen. mer in haer stede sette hi iongelingen Ende die ion ghelingen seiden daer zeer teghen: ende sij baden hem dat hijse oec verlaten wilde: mer hi seide hem dat hijse om gheenrehonde bede verlaten en soude Die boden die hem geseynt waren wt alle landen ende die hem die heerscappie van alle landen op gauen: quamen tot hem mit ontallike presenten van costeliken gulden iuwelen van gesteenten ende van zyden werke. als van wapenen van

[fol. i1r]

cronen ende van paerden Ende dese ontfinc hi alle vriendelic ende hi gaf hem schone presenten weder om Hier en binnen seynde hem Olymphias sijn moeder brieuen die spraken dat hi hem wachten soude van Antipater dien verrader. want sy hadde anxt dat hi hem verraden soude. Als Alexander dese brieuen gelesen hadde soe ontboet hi sonder beyden Antipater dat hijs nergents om laten en soude hi en quaem tot hem in Babilonien inder stat Hier om wort Antipater tornich inden weghe doe hi te Babilonien waert quam ende hi dede maken een fenijn dat inder werelt gheen stercker wesen en mochte