Die hystorie dat leuen ende dat regiment des alre grootsten ende machtichsten conincx Alexander die heere ende prince was van alle die werelt

Hoe Alexander weder antwoorde Ca: lxi

[A]Lexander screef hem weder: ende seide Ic en prijse voor gheen salicheit dat ghi v lant soe vry hiet. want het is bet een karcker dan lant om dat ghi nergents en gaet noch en vaert in anderen landen. Ende oec om dat nyemant op v en acht. Dit dunct ons een crancke salicheit: want ghi en sayet noch en plant bomen noch en maeket huysen noch zalen. ende dit dunct ons alle katyuicheit Aldus en gheeft ons gheen wonder dat gi

[fol. h6r]

leeft als beesten: mer datmen reyn leeft in weelden dat is een eerlic dinc Dat ghi mit vrouwen niet veel en sijt wye salt v mogen prisen Want uwe wijuen sijn onbequaem: het waer scande dat se menich man begeerde Mer wi gebruyken alle dat die aerde draecht mit vryen wille in ons te wachten van sonden ende ontscult te hebben Aldus soe nam die tale een eynde tusschen alexander ende die Bracmannen Maer alexander seide hier int eynde dat hi wel waer die alsoe dede Mer nochtans bleef Didimus voor ende int achterste int beste Want sijn geloue schijnt alleheel der kerstenen gheloue ghelijc te wesen. daer hi seyt God is dat woort ende biden woorde worden alle dingen geschepen ende onthouden