Die hystorie dat leuen ende dat regiment des alre grootsten ende machtichsten conincx Alexander die heere ende prince was van alle die werelt

Hoe Didimus Alexander antwoorde Ca. lx

[D]Idimus antwoorde hier op aldus Alexander Wij en sijn niet vryelinghen van deser werelt: mer wi sijn hier al gasten want wi en bliuen hier niet geduerich: ende wij liden doer dese werelt als een pelgrim die tot sinen lande waert vaert so ontcommert van alle dingen ende so licht dat ons die sonden niet en beswaren. noch gulsicheit noch ander quaetheit voor

[fol. h5v]

gode diemengheenen mantel maken en mach Mer wij haesten ons onsen wech ouerlijdende tot gode waert mit zuuere consciencien ende mit een aensicht dat hem niet scamen en derf. Ende wi en willen gheen goden wesen noch gode achterdeel doen Mer ghi mint tot uwer onsalicheit gode mit cleynre giften: Wij en sijn niet sculdich te verteren noch te begeren al dat wi syen. want dat en ware gheen besetheit noch eere Ende god heeft meenich dinc opter werelt ghemaect om dattet die werelt niet oerbaerlic en ware. noch sonder hem niet en soude mogen staen Mer god heeft den mensche gegeuen die nutscap vanden dingen die hi ghemaect heeft tot haren vryen wille die hi hem vry gelaten heeft: Ende so wye hem dat mit vryen wille hout an dat quaetste ende laet dat beste. die en vaert bi gode niet. mer hi verdient gods vyantscap daer mede