Die hystorie dat leuen ende dat regiment des alre grootsten ende machtichsten conincx Alexander die heere ende prince was van alle die werelt

Een antwoorde van Didimus tot Alexander Capit: lviij.

[D]Idimus die coninc vanden Bracmannen antwoorde tot alexander aldus Heer coninc ghi versmaet onse boden die wi tot v senden als onwaerdige luden daer ghi nochtans sulke niemaren van ons gehoort hebt. Maer nv sal ic v van onsen zeden die waerheit segghen Die bracmannen leuen een simpel leuen. ende minnen alle suuerheit ende haten alle onreynicheit Si en begeren anders gheen dinc dan die nature verleent Onse lijftocht is simpel ende onsen cost en is niet groot Want wi en begeren gheen lecker morseelen: mer wi eten onse spijse onderlinge alsoe die aerde draecht sonder grauen ende ackeren Want wi en eten gheen dinc dat leeft. ende hier om en

[fol. h3r]

wort onder ons nyemant zieck noch en quelet: Wy hebben oec een zede dat nyemant den anderen en helpet: want wi sijn altijts alle effen rijck. Hier om soe leuen wij sonder haet ende nijt. ende wi hebben alle effen grote armoede En aldus soe sijn wi alle effen rijck van goede Wi en hebben onder ons gheen wet: want onder ons en is nyemant die misdoet Wi en weten oeck niet van arbeyde daermen an winnen mach. want die gyericheit is al quaet Ende soe wye datter mede beuangen wort in sijn herte: sij brenct hem ter armoeden ende scanden want die gyericheit en heeft gheen scande noch eynde. ende soe die gyericheit meer crighet hoe sij meer begeert te hebben Wi en begeren gheen dinc dan dat wi steruen moeten sonder pijn Wij slapen sonder sorghe: ende wi en eyschen van nyemant dienst cleyne noch groot Wi sijn alle vry. sonder dat allene ons vleysch onderdaen is onser redene Ende wi houden ouer felheyt dat wi ons gebueren dwingen souden om ons onderdaen te wesen die die moeder der nature ons ghelijc gemaect heeft. ende die vader van hemelrijc tot sijn rijcke geroepen heeft. daermen ewelick in leeft mit blijscappen Wij leuen gemackelic in onse holen want nyemant en derf ons daer in storen. Ende wi en dragen oec gheen costelicke clederen: want wi decken ons al mit papelen alsoet ta-

[fol. h3v]

melic is Wij en willen gheen vrouwen om oncuysheit mede te doen. mer om dat wi begeren kinderen daer aen te winnen Onder ons so en sterft nyemant voor sinen vader ende mitten doden en maken wij gheen feeste want het is mit ons alleens mitten minsten ende mitten meesten: Maer uwe zede is dat ghi groot goet leght anden doden ende ghi en laet der aerden niet hebben dat haer is: mer ghi ouerdect uwe dooden mit siluere ende goude ende ontneemt der aerden aldus dat haer toebehoort In ons lant en valt gheen plaghe want wi en ontsuueren die lucht niet mit quaetheden daer die plagen om plegen te geschien Die wint ende dat weder is in onsen landen ghenoechlick naden tijt vanden iare Wij en houden anders gheen medicijn dan dat wi eten soberlic zuuere spijse: want vasten doet wel genesen ende hout ons gesont Wij en plegen gheen spel. danssen noch roeyen noch tornoyen noch spel van dieren te maken: ende wi en varen nergent om sulck spel te ansien. want die werelt ende den hemel geuen ons genoech schoonheden te ansien Want wi sien den hemel dat hi schone ende claer is. ende allesins wel gecyert is mitten sterren en planeten Oeck syen wi in die zee die gedaente van purpure ende oec van die visschen in menighen manieren daer in spelen ende springhen Dan syen wi voort hoe die zee die aerde

[fol. h4r]

allesins omme helset heeft: recht oft haer suster waer Wij hebben oec groote genoechte te syen op die groote weyden die al om ende om mit schoon groene bloemen staen die soe wel ende soete ruken voor die ogen ende voor den sin ende daer hebben wi veel genoechten in Wi hebben oec grote ghenoechte aen te sien die wilde bosschen ende die groene bomen daer die vogelen soe schoon ende soet op singhen Dit sijn die rijcheden der naturen ende haer schoonheden ende weelden Wij en varen nimmermeer te lande noch ter zee om comenscappe te doen: want die rijcheden van vremden landen en sullen nimmermeer onsen sin verwinnen Ende wi en begeren niet meer van aertschen goeden dan dat wi in armoeden leuen mogen blijdelic ende sonder sorghe Wij en leren oec niet schone spreken want daer leyt loosheit in: ende men becleet die logen mit schoonre talen also schone datter menich man mede bedrogen wort Want men ontschul dicht daer mede de misdadighen ende men verduy stert daer mede dat recht Dan prijsen die ghene diet horen den taelman ende seggen dat hi wijs is: mer dit is een onsalich prijs die die consciencie besmettet Maer onder ons en doetmen dit nimmermeer. want wi hebben een zeer simpele sprake die altijts wel ende waersprekende wesen moet Ende wi en willen tot gheenre scho-

[fol. h4v]

len gaen: anders niet dan daermen leert dat sekerste ende dat beste. want wi en leren anders niet eeren dan dat ouerste goet. Ende ghi leert te vogelen ende te doen dat genoechlic is uwen vleische Wij en offeren gode gheen beesten. noch en maken hem gheen grote costelicke tempelen ende outaren als ghi doet Ende v luden dunct datter gheen arm luden en sijn die uwes goets te doen hebben Dat is groote misdaet want god wilt gheeert wesen om sijn grootheit mit suueren dienst sonder bloet te storten ende te offeren Want alsmen hem bidt mit suueren woorden soe doet hi den menschen genade Want god is selue dat woort daer alle dingen bi gemaect sijn ende alle dingen behoet hout ende voet Dat woort minnen wij. want dat heeft ons nv gegeuen onsen geest ende ons leuen. Mer om dat god selue is gheest ende leuen soe en machmen niet wel gewinnen sijn vrientscap mit desen aertschen goede: mer men wint sijn vrientscap mit suueren leuen ende datmen hem altijt dancke ende loue Hier om segghen wi dat ghi onsalich volck bent. want ghi en verstaet niet dat v beghin is vanden hemel. ende dat ghi maechscap hebt mit gode die alle dinc gescepen heeft Mer mit dorperlike dinghen besmet ghi uwe edelheit altemael om dat ghi die genoechte uwes vleysches volget na sijnre begeerten: ende dat ghi vercoren hebt ende minnet

[fol. h5r]

alle dingen die comen vander aerden: ende die minne daer of ontsuuert die lucht: dat water ende die aerde Noch doet ghi veel meer quaets want ghi sijt gode al of gegaen ende ghi aenbedet dode luden recht of sij goden waren want sij sijn moortdadighe luden ende vyanden die v tot alle scanden brengen