Die hystorie dat leuen ende dat regiment des alre grootsten ende machtichsten conincx Alexander die heere ende prince was van alle die werelt

Hoe Alexander den Bracmannen weder screef Ca. lvij

[V]An uwen zeden hebben wi dicwijls ghehoort dat v leuen niet en is ghelijc den leuen dat gemeenlic alle menschen leuen soe dattet ons dunct onmoghelic te wesen en dede dat

[fol. h2v]

wijt gehoort hebben Hier om coninc didimus so biddic v dat ghi tot onser lieften ouer wilt scriuen. oft waer is dat wi van v gehoort hebben ende maket ons vroet of ghi leeft om exempel te geuen van uwen leuen Ende dit doet ons: op dat als wi also v leuen horen: dat wi ons daer in keren mogen oft ons alsoe geuallen mochte: Want leeringhe is een vry dinck ende wijsheit en scaet niet alsmense totten gemeenen profijt gebruyct Ghelijc dattet een barnende kaerse niet en scaet al ontsteectmen daer veel ander kaersen aen daer ander luden by syen. want haer licht en wort des niet te minre