Die hystorie dat leuen ende dat regiment des alre grootsten ende machtichsten conincx Alexander die heere ende prince was van alle die werelt

Hoe Alexander der maechden lant wan Ca: lv.

[A]Ldus voer alexander doer dat wilde Indien ende hi quam int eylant Faciaten. daer hi Porrius vant die alexander daer ontbeyde mit alle sijn heer Hier om beual alexander den heeren die hi alle dat lant van Persen ende Meden beuolen hadde dat sy souden doen maken grote lange colompnen van finen goude. ende dat si alle sijn gesten daer in scriuen souden Endedat sijse by Porrius rade voeren souden in dat hoochste Indien: ende dat sijse verre ouer Liberbatus ende Hercules palen setten souden. Iae dat sijse oec tien voet hoger setten souden dan haer palen waren. want hi was dieper int lant dan sij waren Nochtans verloes hi daer wel M. ende L: mannen Seneca spreect van alexanders macht ende van sinen rijcke aldus Die coninc Alexander was soe fyer dat sijn verwaentheit ghinc bouen alle menschelicheit. want doe hi die werelt verwonnen hadde soe wilde hi oec den hemel verwinnen Ende hem quam in sijn sinnen dat Demetrius geseyt hadde datter veel werelden waren Daer om seide alexander Ay mi keytijf dat ic binnen minen leuen een werelt niet ghewonnen hebbe dat

[fol. h1v]

sal mi lange rouwen Nv liet Alexander in Indien een ruwaert ende hi voer weder te Babilonien. Maer onder weghe dede hi tondere der maechden landt: soe dat sy hem tribuyt ende tijnse gauen Ende inden weghe quam hem die boetscap dat hem die boden brochten den seghe van al Europen ende sy gauen hem op alle haer lant: ende sy brochten hem grote presenten Ende haer tribuyt was vander rijcker stat Cartagien ende Spaengen lant ende van Cecilien ende van Gallien dat menighe mijle verre leyt. van Ardennen ende van Ytalien Ende alle delen tijns ontbeyden hem in Babilonien mit menighe grote presenten Doe haeste hem alexander zeer derwaert om dat hi daer die heerlicheit van alder werelt ontfaen wilde. om heer daer ouer te wesen Want doe hi in Indien soe diep gheuaren was so seide dat volc vanden lande gemeenlic dat hi nemmermeer steruen en mochte om dat hi so verre ouer Liberbatus ende Hercules palen geuaren was: Hier om en hilt hi daer niet veel of wat hem die bomen geseit hadden. want hi gheloefde bet anderen Ende aldus wort hi bedrogen Nv sult ghi horen hoe Alexander tot die Bracmannen voer