Die hystorie dat leuen ende dat regiment des alre grootsten ende machtichsten conincx Alexander die heere ende prince was van alle die werelt

Van Alexanders verwaentheden Ca. liiij

[D]Aer na voer alexander wech: ende alle sijn volck ende sij quamen in een dal daer veel serpenten in waren die den steen Mirauden dragen in haren hals die schone waren: ende dat

[fol. g6v]

heer wanner menich: Daer nae quam alexander onder wonderlijke beesten die hoofden hadden ghelijc leeuwen Ende daer mede quamen voghel grijpen die hem veel quaets deden ende dat heer weerder hem teghens mit speren ende mit scutten sterckelijc. nochtans lieten si daer wel twee C: mannen doot: maer onder cleyn ende groot sloegen sij daer wel acht duysent beesten doot Hier nae quamen sij op een ryuiere ghehieten Ecclinas. ende dat water is derdalf mijle wijt: ende an elcke syde stont groot lanc riet dat meerder ende langer was dan eenich boom wesen mochte. ende dat riet lach al vol olyphanten. mer sij en deden alexander noch sijn heer gheen quaet Ende alexander voer mit sinen heer ouer dit water mit scepen van ryet gemaect Ende doe sij alle ouer waren so ontfinghense die wilde luden alle dat heer vriendelic Si vonden daer wilde wijuen in een water die schoen wit haer hadden ende schone claere huden Dese wiuen plegen dicwijle mannen te vaen ende verdrenckense of sloeghense doot of brochtense ter doot mit haer grote luxurie Alexander vinc twee van dese wijuen die een huyt hadden soe wit als znee Van daer quamen sij opter ryuiere Gangres die inden bybel Fylon hiet. ende sij coemt wten paradyse Dese ryuiere is soe wijt datmen vanden enen oeuer anden anderen niet ouersien mach

[fol. h1r]

Daer nae quamen sij daer sy beesten vonden die voor wten hoofde quamen groote hoornen die ghetant waren als een saghe: ende van dien sloegen sij doot viij M: ende vier C: