Die hystorie dat leuen ende dat regiment des alre grootsten ende machtichsten conincx Alexander die heere ende prince was van alle die werelt

[fol. g5v]

Hoe der zonnen boom coninc Alexander die derde vraghe antwoorde Cap: liij.

[A]Ls alexander gegeten hadde so was hi zeere naerstich om voor den dage te comen totter zonnen boom om weder antwoorde te ontfaen van dat hi begeerde Ende hi ginc ter mueren waert vanden bosche mit die drie die mit hem waren Ende doe sij totten pape quamen vonden sij hem noch slapende ende gedect mit huden bouen ende beneden. want die luden en hebben anders gheen slaeplakens Ende bi hem lach een harde corste op een tafel van balsame gemaect die hem des auonts gebleuen was. ende daer bi lach een mes van yuorien want in dat lant en is gheen yser noch loot mer daer is alte veel gouts. noch die luden en hebben daer gheen laken: Ende die pape stont op ende ghinc mit hem binnen: Alexander ginc staen voor der zonnen boom ende aenbede hem Ende hi pensde wye hem doden soude ende wat sijnre moeder ende sijnre suster geuallen soude Als die zonne began te rijsen: soe antwoorde hem der zonnen boom in gryex aldus Alexander Seyden wi v dien verrader die v ter doot brengen sal. so soutstu hem doden. ende also soudt ghi dat dinc verdriuen dat immer gheschien moet Want ouer een iaer ende ix: maenden sult ghi steruen te Babilonien in die stadt: Maer men en sal di dijn lijf niet nemen mit ysere noch mit stale noch mit metael

[fol. g6r]

noch mit siluere noch mit goude Want ghi sult mit fenijn vergeuen worden Olymphias sal een iammerlicke doot steruen. ende men salse onbegrauen laten om datse die vogelen ende beesten eten sullen Dijn suster sal lange in groter eeren bliuen: al en salse niet langhe leuen Ghi sult al die werelt onder v hebben als een here Nu gaet henen ende ruymt onsen bosch ende en vraghet ons niet meer. ende vaert haestelijc ter poorten van Faciaten waert daer Porrius ende dijn heer v wacht Die pape seide v hantgheslach ende screyinge vertorent god zeer ende den heyligen boom Here coninc ruymt haestelic dat bosch. Veel luden twijfelen wye dese antwoorde gaf. want die bomen en spreken niet: Sulcke luden segghen dattet een engel gods was Ander seggen dattet die duuel was: maer dat en gheloue ic niet Want die duuel en mach alle gepensen vanden mensche niet weten. ende hi en mach niet weten wat daer geschien sal. ende al seit die duuel somtijt waer nochtans veynst hi dicke logene Mer om dat stemme seide al dat waer was soe houde ic nochtans dat sij van gods wegen was.