Die hystorie dat leuen ende dat regiment des alre grootsten ende machtichsten conincx Alexander die heere ende prince was van alle die werelt

Hoe Alexander sijn eerste antwoorde ontfinc vander zonnen boom Cap. l:

[D]Ie pape seide tot alexander Hebt v herte ende v gepeyns voor v: waer of dat ghi weten wijt: mer en spreect niet mer peynst mitter herten ende syet opwaert naden boom Ende hi sal v dan antwoorden soe wat ghi begheert te weten: want sij spreken gryexe ende ioetsche talen beyde gader zeer wel Die coninck ende sijn geselscap te samen wachten hem van quaden berade ende sij sagen ten bome waert op Alexander peynsde of hi mit gheluc ende seghe weder te lande keren soude Doe antwoorde hem der zonnen boom ende seide Alexander ghi sult alle die werelt onder dijn bedwanc doen ende onuerwonnen bliuen van striden. ende heere bouen alle die

[fol. g4v]

werelt wesen: mer nemmermeer en coemt gi te lande. Dit seide die boom in ioedtscher tale mit cleynre spraken: Mer dit woort misquam alexander harde zeer endehem was leet dattet alsoe veel van sinen ridders hoorden. ende sij begonsten te weenen Ende alexander verboetet hem allen mit giften ende mit dreygen dat sijt nyemant en souden seggen dat sij gehoort hadden. ende hi wilde bliuen om anderwerf antwoorde te ontfaen vander manen boom Mer die pape seide hem dat dit niet wesen en soude voor ter middernacht dat die mane rijsen soude Hier om so bleef alexander daer. ende hildt mit hem Pernitasse ende Fylotinen ende Clytone sijn neuen die cortelic wt gryeken gecomen waren: Want die mane seide hem dat hem nyemant doot slaen en soude mogen ende hier om ontsach hi hem te min. ende liet alle die ander ridders wten bosch gaen.