Die hystorie dat leuen ende dat regiment des alre grootsten ende machtichsten conincx Alexander die heere ende prince was van alle die werelt

[fol. g3v]

Vander zonnen ende manen boom Ca: xlix

[A]Ls alexander biden bome quam soe quam haer pape tegen hem wt te voete. Ende hi was gecleedt al mit huden. hi stont ghetant als een hont: ende sijn oren waren doergaet ende daer hingen gulden ringen an mit preciosen steenen Die pape vraechde Alexander wat hi daer dede of wat hi wilde Alexander antwoorde dat hi syen wilde die heylige bomen vander zonne ende van die mane Die pape seide Op dat hi ende sijn gheselscap zuuer ware ende sonderlinge van wijuen. soe soude hijse sien ende horen spreken wat hi begeerde te weten Mer hi seide dat der zonnen boom sprac des auonts als die zonne onder ginc ende des morghens als si op soude gaen. ende der manen boom des gelijcx Endedie bomen stonden in een bosch int midden dat al omme bemuert was mit een muere Doe sij daer binnen gaen soe hiet die pape hem allen of doen haer costelicke clederen endeschoenen ende haer iuwelen Ende doe sij binnen gegaen waren so sagen sij schone bomen int midden staen ende elck was wel C: voeten hooghe: ende daer hinc balsame aen die daer of dropen ende was ghelijc kryeken Ende die coninc ende sijn gesellen raepten daer balsame om dat sij soe wel roecken. want die coninc leyde mit hem daer binnen wel drie C: van sijnen ridders Ende om dat dese bomen schoon waren

[fol. g4r]

ende mit balsame soe wel gheladen: soe meende alexander dattet daer veel plach te reghenen. Maer die pape swoer datter nye regen noch vogel of beeste en quamen Want hi seyde hem dat die bomen ghewyet waren inder zonnen ende inder manen eere. ende dat sij so lanc ende so schone waren geworden van heylicheden Doe wilde Alexander den boom offerhande doen mer die pape verboetet hem: ende hi hiet hem ende sijn luden dat sij den boom anbeden ende cussen souden Dese pape ende die luden van desen lande pleghen wel drie hondert iaer te leuen of meer.