Die hystorie dat leuen ende dat regiment des alre grootsten ende machtichsten conincx Alexander die heere ende prince was van alle die werelt

Vanden wonderen die in Indien sijn Ca. xlviij

[S]I voeren bet tot Indien waert in ende quamen daer sij naect volc sagen ende die waren acht voet lanc Die manier van dit volc was dat sij altijt in die ryuiere waren ende sij aten raeu visch: mer als sij bet naerder comen souden om dit volc te besien soe doken sij alle onder twater Dan daer quamen sij in een wout daer sij luden vonden die hoofden hadden ghelijc honden Ende daer sloech Alexander getelden ende sijn volc onstac daer menich vuer Mit dien rees een storm soe groot dat alle die tenten auerecht wayden. mer Alexander badt den volc dat sij hem niet veruaren en souden. Ende hij seide hem dat dit die goden niet en daden. maer het was den tijt vanden

[fol. g2v]

[iare dat doe scheiden den herfs] ende den oest ende den winter ende hi beual den volc dat si eten souden. mer daer viel znee op hem soe groot als scaepen vlyesen alsoe datter v.C. mannen of doot vielen Hier na viel groot hagel ende vier te gader ende binnen drie dagen hier nae en saghen sij die zonne niet Alexanders ridders seiden dat dit der goden wrake was: om dat een sterffelijc man also koen was dat hi varen dorst ouer Liberbatus ende Hercules palen ende sij waren gram. Doe quam alexander ten berge van Ethiopien ende daer vant hi open Liberbatus hol: Dat was in een berch die al metalen of gulden scheen mer wye int hol ginc die moest in drie dagen steruen Want als Alexander in een lant quam soe vraechde hi of daer eenich wonder in dat lant was. ende als men hem van enich wonder seide soe wilde hijt immer besien Het geuiel dat hi twee oude mannen vant doe hi in Indien was. ende sij seiden hem van twee bomen die dieper int lant stonden Dat een was der zonnen boom ende dander der manen boom ende sij seiden elck wat hi begeerde te weten Als alexander hoorde soe was hij gram ende meende dat sij dit seiden om hem te bespotten. ende hi wildese doden Mer doe sijt hem zwoeren dattet waer was soe nam hijse mit hem ende hi voer derwert Ende als hi daer int lant quam soe vant hi daer alle tvolc gecleet mit huden van pantheren ende

[fol. g3r]

sulcke huden leyden sij onder ende bouen daer sij sliepen ende en hadden onder gheen bedden Dat volck en at anders niet dan colen gemaect van edelen wyerooc ende van balsame want dit wasset in dat lant zeer veel

Hoe Alexander quam bijder zonnen endemanen boom ende hoe hem een pape te gemoete quam ende was getant ghelijck een hont