Die hystorie dat leuen ende dat regiment des alre grootsten ende machtichsten conincx Alexander die heere ende prince was van alle die werelt

Hoe Alexander binnen Indien waert voer: Ca: xlvij

[A]Lexander quam hier na voor een poorte daer die poorters binnen hoorden seggen datmen alexander mit wapenen niet en soude mogen doden Doe visierden sij een ander dinc ende schoten tot sinen volcke waert mit fenijnde quattelen daer menich man of sterf Ende Ptholomeus alexanders vrient was oec daer of ghequetst. soe dat alexander een cruyt inden drome gewijst wort dat alle dat fenijn verdreef Hier na quam hi tot enen hoghen berch daer groot volc op geuloden was Ende men seide dat Hercules in dien berch bi wijlen was: mer een grote aertbeuinge dreef hem van daer Desen berch wan alexander mit groter pijnen: ende hi voer daer die gulden palen stonden die Liberbatus ende Hercules setten: tot een teyken dat sij dat lant so verde wonnen Doe wilde alexander weten of die beelden die daer stonden binnen hol waren of vol. Ende hi vant dat sij vol waren van finen goude gemaect Hier nae quam hi mit sijn heer daer hi een sterck groote beeste vant mit

[fol. g2r]

twee hoofden die getant was op haren rugge als een sage: ende dit beeste beet hem twee ridders doot Ende dit beeste sloechmen mit hamers doot want gheen spriet en mocht hem deren Daer nae quamen sij op een ryuiere daert heer sat ende at daer quamen veel olyphanten op hem gelopen: Doe beual Alexander den Tessalen dat sij tegen die olyphanten trecken souden ende dat si voor hem driuen een cudde swijnen. want als die olyphanten horen geluyt vanden swijnen soe vlyen si Aldus soe sloegen sij doot viij C: ende lxxx olyphanten ende si sloeghen die tanden wt ende voerdense mit hem. want het is precioes yuoer