Die hystorie dat leuen ende dat regiment des alre grootsten ende machtichsten conincx Alexander die heere ende prince was van alle die werelt

Vanden serpenten ende anderen dieren die alexander vreesden: Capittel xlvi

[D]Oe Alexander gecomen was tot zuueren water so sloech hi sijn getelde viij: milen lanc ende breet Ende hi dede xv.C: vieren maeken want dat ontsien bitende dieren zeer Daer quamen doe alte veel scorpioenen ende terusten die veel quader sijn Daer na quamen menigerhande serpenten. nv blauwe: nv rode. nv blonde nv scire nv witte: nv swarte. nv ander die die huyt gulden haddenEnde te hants wast vol gerufts dat dese serpenten maecten: daer na quamen serpenten binnen den tenten die cammen opt hooft hadden ende sij hadden som twee hoofden oft drie ende haer ogen barnden als vuer Alexander visyerde dat alle sijn heer hem battaelgien soude tegen die serpenten ende elck soude sijn schilt voor hem houden ende sprieten ende speren om die serpenten mede te wederstaen In dit geuecht verloes alexander xx. ridders ende lx. knechts Daer nae quamen witte leeuwen also groot als ossen ende die sloechmen doot mit sprieten Daer nae quamen grote eueren ende pantheren opt heer Ende daer na quamen vleermusen also groot als duuen Daer na quam een beest meere dan een olyphant al swart mit drie hoofden Ende eermen dit dier doden mocht: soe haddet ses en dertich gryeken ghedoot ende liij. ander mannen want het ver-

[fol. g1v]

scoerdet al cleyn ende groot daert op comen conste Hier na quamen opt heer musen die groter waren dan vossen Ende wat beesten dat die beten die bleuen ter stont doot. mer die luden mochte wel vander beten ghenesen Ende hier om dede alexander sinen leytsman doden