Die hystorie dat leuen ende dat regiment des alre grootsten ende machtichsten conincx Alexander die heere ende prince was van alle die werelt

Hoe Alexander doer die roetsche villede Capittel xlv:

[B]Innen enen iare geuiel dit wonder Want alexander verwan Darius in die meye: ende in die hoymaent verwan hi Porrius Daer nae inden oest nam alexander mit hem C: ende l: heren van Indien die alle die wegen kenden: ende hi voer wech om dat hi alle die wildernissen van Indien sien wilde ende hi toech doer dat groote santachtige lant dat daer leit: want in dat lant vantmen eerst zyden werck. ende daer maectmen zyden clederen In desen wech hadden alt heer groten noot van dorst. want sij en vonden gheen water Mer int heer was een ridder die een helm

[fol. f6v]

waters had gecregen mit groter pinen ende die broch hi mitten water tot alexander dat hijs loon woude beiaghen Doe nam alexander den helm mitten water ende storten wt voor dat heer ende dese vromicheit benam menighen man sinen dorst Daer nae quamen sij tot eenre ryuiere die soe bitter was datter gheen mannen of beesten of drincken en mochten Hier bi proeftmen dat een mensch meer lijden mach dan een beeste: Want van groter noot soe licten sij som kout yser ende som loot: ende som droncken si oec vryne ende olye Ontrent noen quamen sij bi eenen berch daer sy alle dat volck naect sagen Ende Alexander badt hem dat sij hem goet water wijsen souden. mer doe scuylden sij alle neder: ende men schoet van ouer dat water nae hem: ende doe decten sij hem te meer: Doe beual alexander om dat hem des volcx verwonderde twee C. van sinen luden ouer die ryuiere te zwemmen: mer als sij die helft ouer geuaren waren soe verbetense die water padden mit groter torment Doe wort Alexander so gram dat hi. C van sinen leytsmannen inder ryuiere dede werpen: ende die water padden haddense haest gegeten Corts hier na vonden sij luden die hem water wiseden. mer als sij totten water quamen soe hadden sij alden nacht genoech te doen om tegen die leeuwen te vechten ende tegen tygren ende beeren daer sij hem met pinen doer verweerden