Die hystorie dat leuen ende dat regiment des alre grootsten ende machtichsten conincx Alexander die heere ende prince was van alle die werelt

Van Candax der coninginnen Ca: xliiij

[H]Ier mede liep die mare ende Candax die coninginne van dien lande die zeer subtijle was van sinnen seynde eenen scilder die wel beelden maken conste Ende sy beual hem dat hi al sijn subtijlheit daer an leyde dat hi alexanders beelde wel maecte na sijn gedaente ende dat hi haer dan dat brochte Want hier te voren had Alexander haer brieuen gesent van grote vrient-

[fol. f5v]

scap Sy sende hem een groot present vanden houte ende van gout ende preciosen gesteenten. ende sonderlinge dieren ende vogelen van menige manieren Binnen dat dit geuiel soe quam candeles haer zoen haestelic tot Alexander gevlogen om succoers want hem wort sijn wijf ontuoert Alexander settede Phtolomeus in sijn stadt ende hi dede hem seluen hieten Antigone eenen maten ridder van alexanders heer Ende Ptholomeus gebaerde hem tot candeles of hi die coninc Alexander gheweest had. ende hij seide tot alexander Antigone Gaet doet desen man succoers ende wreeket ouer sijn vyanden Alexander nam mit hem vier M. ridders: ende voer mit candeles der coninginnen zone ende hi vinck sijn vianden ende verloste sijn vrouwe Hier om bedancte candeles Ptholomeus zeer dien hi voor alexander hielt Doe begeerde Ptholomeus als heere dat hi begheerde sijn moedere te sien. mer hi wilde daer te voren seynden Antygone: ende des was candeles harde blijde Aldus voer Alexander tot die coninginne Candax oft hi Antigonus geweest hadde Doe dit die coninginne Candax vernam so quam sy tegen haren zone ende sy cussede alexander zeer om dat sy hem eere doen wilde: ende sy leyde hem in alle steden in haer cameren ende toende hem veel rijcheden Alexander antwoorde dat hi veel meer rijcheden ghesien hadde in Gryeken dan hi daer vant. Doe seyde

[fol. f6r]

die vrouwe tot hem Mi dunct immer dat ghi selue alexander bent Hi seide vrouwe ick en ben niet Doe leyden sy hem in die stat daer sy sijn beelde gheset hadde ende dedet hem syen ende sy seide Merct wel ende besiet hier aen dat die coninginne Candax wijser is dan alexander Doe was alexander zeer veruaert ende hi beclaechde zeer dat hi daer gecomen was Doe seide de coninginne En weest niet veruaert. ghi hebt minen zone trouwe gedaen ende ic salt v lonen Si hieten v Antigonus die willen: maer ghi sijt mijn heer alexander Ende sy brocht hem weder in sijn behout sonder vrese Nochtans wilde hi haren ioncsten zone gedoot hebben: om dat hi Porrius dochter te wijue hadde