Die hystorie dat leuen ende dat regiment des alre grootsten ende machtichsten conincx Alexander die heere ende prince was van alle die werelt

Hoe Alexander die doncker zee bestont Ca. xliij:

[A]Lexander wort van sijnen vrienden wter stat gedragen ende sij beclaechden zeer Ende alle dat volc van binnen der stadt sloegen sij doot Hier gedoechde Alexander grote smerte eer hi ghenesen was Ende hier bekende hi ende seyde Al hout mi alt volck dat ic iupiters zone ben Dese wonde leert mi dat ic een sterffelic men

[fol. f5r]

want hi conste qualic genesen Ende doe hi genesen was soe bereyde hi hem ter stont om voort te varen Mer hi sende Polipertoene mit een schoen here in Babilonien want hi was mitten heer verladen: ende hi was selue beraden dat hi die groote zee syen wilde ende hi ghinc te scepe om dat lant te besien dat daer binnen lach Sinte Augustinus seit dat hi op die zee een hooft rouer vinck ghehieten Dyometes Doe vraechde hem Alexander wat verwoetheyt dat hem daer toe iaechde dat hi mit scepen in die zee voer rouen: Die rouer antwoorde wat duuel iaecht v dat ghi alle die werelt doer roeft Want om dat ic mi auenture mit cleynre menichten so hietmen mi rouer: ende v hietmen coninc ende heere om dat ghi meer volcx hebt Want alsmen gerechticheit after laet soe en ist conincrijck anders niet dan diefte ende groten roef. mer dat wi rouers hieten dat is om cleynen roef ende moort die wi doen