Die hystorie dat leuen ende dat regiment des alre grootsten ende machtichsten conincx Alexander die heere ende prince was van alle die werelt

Hoe dat Alexander in een stat spranc Ca: xlij

[N]V dede alexander al sijn heer mit goude decken alsoe hi begeerde. alle sijn bannieren dede hi van goude maken. Sy hadden daer so veel gouts dattet die ridders niet voeren en consten: nochtans ghingen mitten heer m. oly phanten geladen mit goude Al der beesten gesmide was gulden ende het blicte harde verde mitter zonnen Ende alle die wagenen vanden heer waren gemaect mit scerpe zekelen. Alexander hadde in sijn heer xij.C: karren die den heer volchden: Ende hi hadde xxx:m: stouter ridders te paerden die in alle noot vroem waren Noch hadde hij drie C.M: man te voete Ende op vijftich stercke mulen voerdemen des conincx harnas Daer waren oeck veel kemels buffelen ende dromedarien die den heer volchden mit vytaelge. mer den last daer of en mochtmen niet vertellen Alexander

[fol. f4v]

reedt seluer voor sijn bannieren: ende hi verwan vierdhande volc Mer doe wouden alle die heren van Gryeken weder te lande keren Daer sprac hijse soe vriendelic toe dat sij hem beloefden mit hem te varen waer hi wilde Doe quam Alexander tot eenre schoenre ryuieren: ende daer doer soe voer hi in die zee in een eylant daer hij dat volc dwanc dat Hercules daer geset hadde te wijlen dat hi Indien wan. Dit volc was zeer sterc ende fel ende quam fellic teghens Alexander mit xxx: dusent mans te voet ende lx: dusent mans te paerde Mer noch dwancse Alexander mit striden so dat sij ontvloden in een stat Subdractas gehieten ende daer beleyde hijse binnen Hier clam alexander eerst op die mure ende hi spranc inder stat: ende daer weerde hi tegen menighen man. Mer hi wort gescoten mit een gauelote beneden sijn spene van een man van binnen: mer die man die hem schoet sterffer om Ende Alexanders volck quam in gesprongen ende holpen hem wter noot: