Die hystorie dat leuen ende dat regiment des alre grootsten ende machtichsten conincx Alexander die heere ende prince was van alle die werelt

Van Porrius rijcheyt ende macht Capit. xli

[A]Lexanders hystorie seit dit vanden camp als voorseit is Mer Iustinus bescrijft dat Porrius van alexander zeer gewont was ende oec geuangen inden strijt daert ors Pucifael in doot bleef Ende dat Porrius hier om so drouich was datmen qualic verbliden mocht dat hi hem liet ghenesen ende dat hi ate ende droncke Ende doen Porrius genesen was so gaf hem Alexander sijn lant weder mit payse Hier na liet Porrius in die eer van Alexander drie steden maken

[fol. f3v]

Die twee in Pucifals naem dat Porrius doot sloech. ende die derde hiet Myria Porrius hadde in sijn heer xl.M. mans te voet ende acht C. waghenen wel gebattaelgiert ende gemannet: ende in alle syden waren scerpe zekelen daer aen ghemaect die zeer sneden. Hier toe hadde hi vier olyphanten die wel ten stride geleert waren om die battaelgie daer mede te doer breken Ende elck olyphant hadde een stercken toren op daer gewapende luden in waren ende scutters Ende die toernen waren binnen wel gespijst. ende dit was een sterc heer Porrius hadde oec een zale die xxx: colompnen lanc was ende die was wel gewrocht van finen goude Ende die wanden daer of waren al van finen goude gedect vingers dick al ouer ende ouer: daer binnen hadde hi een wijngaert mit rancken daer die scoten ende die blader of gemaect waren al van finen goude Ende die druuen waren gemaect van mirande ende van cristale Daer waren oec an gemaect alte cyerlike asement cameren ende slaepcameren daer die wanden alte properlic ghemaect waren van finen goude: Daer waren in geset carbunkelen ende ander preciose steenen Die doren van desen palayse waren al yuorien Die balcken waren al van ybenen houte. ende dit palays was al ouer gheweluet mit cypresse Ende daer stonden in gemaect veel beelden groot ende lanck van finen goude

[fol. f4r]

nochtan en waren sij van binnen niet hol Ende elck beelde had in die hant eenen cop van goude Daer stont oec een platamus van fijnen goude die groot genoech was in dier gelijcke oft een gulden linde geweest hadde. Daer waren oeck veel nappen van preciose steenen ende van cristalle Endedaer waren oec noch veel meer ongeloeflike scatten ende duerbaer steenen ende ontallicke duerbaer cruden Ende al dit grote goet quam alexander al tsamen in sijn handen: