Die hystorie dat leuen ende dat regiment des alre grootsten ende machtichsten conincx Alexander die heere ende prince was van alle die werelt

Hoe Alexander in Indien eenen zone wan Ca: xxxix

[I]Ustinus seit Doe alexander in Indien quam soe dede hi sijnre ridderen ghesmide van haren scilden silueren maken ende oec haer harnas Ende cortelick hier nae soe quam hi voor een stat gehieten Mysa. mer dat volc datter binnen was en wilde hem niet weren want sij verlieten hem op haren god gehieten Liberbatus Hier om hiet alexander datmen die stat vermyden soude Ende doe hieldt hi daer bi leggen mit sijn heer an eenen berch diemen heylich hiet: ende dat en was niet verde vander poorten: Op desen berch wasset alsoe schone mit wewende ende wijngaert al ouer sonder oefenen Van deser stat voer alexander in eenre coninginnen lant die Cleophilis hiet Dese vrouwe ghaf haer op in alexanders handen: mer sy breede haer seluen haestelick ende sy dede alexanders wille: Ende hier om gaf hi haer haer lant weder ende haer vryheit. Ende aen deser vrouwen wan alexander een zone die sy alexander dede hie-

[fol. f1v]

ten: ende dese alexander wort namaels coninck van Indien Doe vergaderde Porrius mit hem een alten groten heer om te striden tegen alexander Ende alexander toech oec vast voort om tegen hem te striden Ende beyde die battaelgien vergaderde ende aen beyden syden bleef zeer groot volck doot Ende int vergaderen vanden strijde soe reedt Porrius alexanders ors Pucifal doot Doe wort Alexander zeer veruaert ende droeue om sijn paert: want hi was doe seluer in groter auenturen Ende die gryeken quamen toe slaende haren heere te hulpe daer hi te voete stont. ende daer bleef menich man doot ende ghewont nochtans holpen sij Alexander wter noot Mer hi liet alle weere ende gheuecht staen ende hi nam Pucifael biden stert: ende hi toecht an die een syde Want hi ontsach hem dattet die van Indien gheroeft souden hebben ende dat en hadde hi om gheen goet ghewilt Dus toech alexander achterwaert ende hi maecte tusschen hem beyden een bestandt xx dagen duerende Want binnen die tijt mochtmen ghenesen die gequetsten ende die doden ter aerden doen nae haer waerdicheyt ende verdiensten