Hoe Alexander Calistines doode Ca: xxxviij
[H]Ier nae doe alexander weder becomen was ende hi weder began te oerlogen soe verwan hi tweerehande volck die hem op gauen ende brochten hem giften Doe gheboet alexander datmen hem aenbeden soude als een god Calistines laecte hem dit ende hi seide dat hi pensen soude dat hi sterffelic ware Hier om wort alexander zeer gram ende hi teech hem an dat hi vernomen hadde dat hi hem verraden soude Ende hi dede hem alle sijn leden of sniden sijn nose ende sijn oren ende sijn lippen: soe dattet elcken mensche ontfermde die hem sach Daer nae dede hi hem sluten mit wilden honden om datse hem verscoren ende verbiten souden: ende dat die luden die desen syen souden in deser pinen hem veruaren souden. Lysimagus een ridder die Calistines discipel plach te wesen in sijnre scolen die hadde ontfermenis op sijnen meester dat hi hem in deser pinen sach Ende om dat hi sijn pijne corten wilde soe gaf hi hem een cop mit fenijnden dranc om dat hi te eer steruen soude Hier om soe balch hem Alexander ende hi dede hem werpen voor eenen leeuwe. nochtans so liet die
Auteursrechtvrij