Die hystorie dat leuen ende dat regiment des alre grootsten ende machtichsten conincx Alexander die heere ende prince was van alle die werelt

Hoe Alexander Clitus doot sloech Ca. xxxvi

[O]P een tijt sat alexander in een feeste ende

[fol. e5v]

hi sat en at ende dranc mit sinen voorbarigen heren soe dat hi al droncken wort Ende men began daer te spreken van Philippus alexanders vader Ende die heren begonsten Philippus te prysen: mer Alexander prees hem bouen sinen vader ende verhief hem harde zeer Ende dat meeste deel van sinen heeren warens hem mede: om dat sij hem daer aen lief wilden seggen Maer daer was een ridder die Clitus hiet: ende hi peynsde hi soude die waerheit segghen hi balchs hem wye wilde ende hi prees meer Philippus. Doe wort alexander op hem zeer vertorent ende hi greep een spere die een knecht in sijn hant hadde ende hi doer stac dese Clitus die een out vroem ridder was: Ende doe dese Clitus doot lach soe riep alexander tot hem Besyet wat v Philippus nv helpen mach Maer des anderen daeghes als hi nuchteren geworden was ende gedocht wat hi gedaen hadde soe wilde hi hem seluen gedoot hebben van rouwe. ende hi ghinc ende wilde Clitus cussen Ende en haddent hem sijn vrienden niet benomen: hi soude hem seluen op die seluer stede gedoot hebben Want hi bedochte hem seluen dat Clitus suster sijn amye was: ende dat hi oec om dese selue saeke ghedoot hadde Persemoene ende Fylatone ende veel ander luden van sinen genoeten Dit ghinc Alexander alte zeer beclagen. alsoe dat hi in veel daghen niet en at Totdat

[fol. e6r]

hem geboden sijn heeren dat hi ate Ende sonderlinge Calistines sijn gheselle die mit hem voor Aristotiles ter scholen ginc. ende dese was zeer wijs ende hi was cortelic tot alexander gecomen om hem wat goets te raeden.