Die hystorie dat leuen ende dat regiment des alre grootsten ende machtichsten conincx Alexander die heere ende prince was van alle die werelt

Die wrake van coninc Darius doot Ca: xxxv

[A]Lexander seide tot sijnen ridders ende heeren Ghi heren ic ben blijde ende zeer wel te vreden dat Darius mijn vyant aldus doot is ende oec ben ic den ghenen dien ter doot gebrocht heeft om minen wille sculdich groot loon ende eer. ende dat soude ic doen om dat ick wiste wye sij waren: Daer om biddic of sij hier sijndie dus veel om minen wille gedaen hebben dat sijt mi nv openbaren: want ic meense hoghe heeren

[fol. e5r]

te maken Doe dit Bessus ende Narbesmes hoorden so waren sij blijde ende quamen alle beyde voort ende seiden dat sij desen moort gedaen hadden Ende doe dedese Alexander beyde wel hoge hangen Ende hi seide dat hi niet versworen en waer ende dat hi oec niet en loghe. want hi maectese hoghe heeren Daer wort oec een ander gheuangen die den raet ende den moort van Darius toe bracht Ende dien leuerde Alexander darius broeder te wraken Doe toech alexander haestelick op Terdus die schone ryuiere. ende daer dede hi een stadt op maken binnen xxij: dagen die hi na hem Alexandrien hieten dede. ende hi muerder eenenmuer al om die stadt die vi. milen lanc was Ende hi vergaderde volc wt sommige steden die Tyrus bi wijlen gemaect hadden ende dedese in deser stat woenen Men vindt oec bescreuen dat Alexander alle iare een stat maken dede die hi Alexandrien dede hieten Ende dat waren xij: Alexandrien in die .xij iaren dat hi regneerde. ende in desen steden liet hi luden van sinen here die te cranc of te oudt geworden waren Ende hi dede inder muren van den steden houden dat die steden hadde doen maeken Alexander Iupiters zone Mer dit was een grote sotheyt dat hi hem seluen voor god hilt die leuen moeste mit spise ende dranc als ander luden