Die hystorie dat leuen ende dat regiment des alre grootsten ende machtichsten conincx Alexander die heere ende prince was van alle die werelt

Vander poorten van Caspien Ca. xxxiiij

[N]V wil Alexander trecken totter poorten van Caspien: Solinus scrijft hoedanich dat dese poorten sijn Hi seit het is een enge pat

[fol. e4v]

gehouden inden roetsen endeis viij: milen lanc ende so nauwe datter qualic een wagen doer liden soude In beyde syden sijn die roetsen so hoghe daer sij wt gehouden is. ende die roetsen tranen altijts vansoute aderen Ende die verscheit verherdet ende wort glat oft ys ware. soe dat die wech soe quaet is ende so nauwe te gaen dats niemant en soude moghen gelouen Ende alsmen ten eynde van desen wege coemt. soe leit an beyden syden van desen weghe wel xiiij milen lanc zants Ende daer binnen en vintmen gheen verscheit Ende als men ten eynde vanden gate coemt. soe comender soe veel serpenten gelopendatter nauwe yemant mitten liue ontgaen mach ten waer inden winter Doe alexander vernam datmen anders niet lijden en mochte totter poorten van Caspien so vergaderde hi sijn ridders om dat hi weten soude wye Darius ter doot gebrocht had