Die hystorie dat leuen ende dat regiment des alre grootsten ende machtichsten conincx Alexander die heere ende prince was van alle die werelt
(1491)–Anoniem Die hystorie vanden grooten Coninck Alexander–
Auteursrechtvrij
[Folio e4r]
| |
van Caspien soe senden die x: gheslachten van israhel boden an hem Endesij baden oerlof dat sij tegen hem wt trecken mochten Doe vraechde alexander die saken waer om dat sij soe geuangen waren Ende doe sij hem seiden dat sij god van israhel openbaerlic gelaten hadden ende hadden een gulden calf aen ghebeden ende dat hem god propheten te voren geseynt hadde: dat sij hier om souden worden geuangen geuoert en dat sij nimmermeer weder keeren en souden Doe antwoorde alexander dat hijse noch nauwer besluten soude Ende doe dede hi die nauwe wegen van die geberchten bemueren: Ende doe hi sach dat dit werck omleyt was om te volmaken mit menschen pinen soe badt hi god van israhel dat hi dit werck volmaeken wilde Ende te hants ghingen die roetsen ende die bergen die een aen die ander: soe datmen daer nemmermeer ouer comen en mach Ende hier wort gheopenbaert dat god niet en wilde dat sij nimmermeer wt quamen: Nochtans seitmen dat sij wt comen sullen ten eynde vander werelt. ende si sullen groot volc verslaen Doer god so groten daet dede om een quaet mensche: wat sal hi dan doen om den goeden |
|