Die hystorie dat leuen ende dat regiment des alre grootsten ende machtichsten conincx Alexander die heere ende prince was van alle die werelt

Hoe Alexander sijn zeden verwandelde Ca. xxxij

[A]Ls Darius doot was ende begrauen so hief alexander die zeden van Persen op an sijn cleederen ende aen sijn ghewaden ende hi droech die crone van Persen ende liet varen die castume van Macedonien Ende dit beual hi sinen boden seluer te doen die nochtan tegen seiden: Hi ginc houden veel wijuen ende amyen die schoonste die

[fol. e3v]

men in al die werelt vinden mochte: Endedaer mede lach hi nacht ende dach soe hem goet dochte: Hi wort oec alte gulsich van spijsen ende drancke om dat hi meende dat die luxurie niet meerderen en soude hadde hi gemaet geweest van spisenHi maecte spelen in sijnre werscap ende vergat zeere sijn wijsheden. want hi en mercte niet dat sijn rijcheden sijn goede zeden versmoorden Hi was als een tyran op sijn volc ende als een vyant ende hi balch hem zeer als hem yemant seide dat hem mis stont Hi was zeer toornich datmen hem philippus zone hiet ende dat sij seiden dat hi die zede van sinen lande verleit hadde: Hier om worden gedoot Fylotes ende Pinenon sijn vader Aldus soe en maect groote rijcheit nyemant goet: mer sij versmoort goede zeden Hier nam an Alexander Sychem ende alle die luden die onder den berch Tantalus al omme geseten waren. want dit was wilt volc ende onwetende: ende nyemant en condese dwingen dan alleen alexander Hier na quam hi ten berge van Caspien daer die tien geslachten van israhel in besloten sijn Want alsoe inder coningen boec ghescreuen is soe leuerdese god om haer sonden wille Salmanazer den coninc van Assyrien ende die voerdese wt haren.lande ende hi brochtse hier.