Die hystorie dat leuen ende dat regiment des alre grootsten ende machtichsten conincx Alexander die heere ende prince was van alle die werelt

Van Philo Anaxigenes ende van Epicurus Ca. xxxi

[T]Ot dien tiden was Anaxigenes zeer vermaert in wijsheden Ende hi leerde alexander in sijnre ioecht grote wijsheit ende doecht Ende het geuiel dat Alexander die stat destrueren wilde daer Anaxigenes in woenachtich was Ende Anaxigenes ghinc wter stadt tot Alexander om een bede te bidden Mer alexander zwoer dat hi op dien dach gheen bede om hem doen en soude Doe sprac die wijse man Nv bidde ic v dat ghi dese stede slechtet: ende aldus verkeerde hi alexander van sijnen quaden sinnen mit subtijlheden Want alexander hieldt sijne woorden ende hi en dede sijn bede niet. ende alsoe

[fol. e3r]

bleef die stat staende die alexander meende te slechten Tot desen tiden was Epicurus oec tot Athenen vermaert inder stat mer hi dwaelde in eenighe saken Want hi seide dat die meeste salicheit vanden menschen was in weeldicheit van vleysche Hi seide oec dat god dese werelt niet en acht ende dat die zielen steruen mitten lichame Hi seide oec eenighe goede punten want hi seide wye wijsheyt wil crigen die moet oec alle weeldicheit laten varen. want wye der naturen recht leuen wil hi en mach nimmermeer arm worden want sulcke comen van groter armoeden tot groten goede. mer dan beginnen sy eerst haer ongeuallicheit Hi seide oec die ergent eten sal sal oec besien mit wyen hi eten sal Dat beghin van alle doecht is dat een sijn misdaet bekent ende dat hi peynse dat hi steruen moet Men sal dat lijf niet geuen tot gulsicheden: mer tot wijsheit ende gemaeticheit: want van weelden coemt dick wijl gheen bate mer euel ende ziecte