Hoe Darius van sinen luden geslegen wort Ca: xxviij
[I]Osephus seit als Alexander liden wilde voor Darius doer die poorten van Caspien Soe toech hi doer Pansilla ende daer moeste hi liden doer een grote ryuiere ghelijc een arm van der zee. ende daer dede god groot wonder Want dat water vander ryuiere scheyde hem in tween ende alexander reedt daer doer opten drogen gronde mit alle sijn heer Dit liet god gheschien om dat hi mit hem breken mochte die macht van Persen Orosius ende Iustinus seggen dat alexander in desen lesten stride wan mit crafte dat rijck van Persen ende Meden Want daer en was nyemant die hem voort meer teghen hem dorsten steken In deser vaert wan alexander meer gouts ende roefs dan yemant des ghelouen soude Hi wan oec Persipolea dat die hooftstat was vanden lande van Persen Dese stat hadde langhe gestaen in vreden. ende sij was vol van groten goede des hem nyemant en bewant: ende dat quam al in alexanders handen Nv ghinc Darius vlieden wt die eenre stadt in die ander stadt ende hi
meende ergent in vreden wesen Ende Darius had
mit hem twee valsche princen die hieten Bessus ende Narbesmes die ouer een droegen. ende sy beginghen Darius daer hi alleen was ende sloegen hem ouer doot ende lieten hem liggen ende si vloen
Auteursrechtvrij