Hoe Darius an Alexander om genade screef Cap xxvij
[N]V hadde Darius alle sijn hope verloren. ende hi viel neder in sijn zale op die aerde: ende bedreef groot misbaer. Hier na had hi raet dat hi aldus an Alexander screef Aen alexander sinen heere Darius saluut ende eere Het ware wel gedaen ende edelheit wout ghi hem genade doen: want auenture heeft hem di tonder gedaen crachtelic inden velde Ic bidde v dat ghi ontfermet mijnre moeder ende mijnre kinderen alsoe dat toebehoort. ende dat ghijse ons weder wilt senden Ende om dier weldaden sal ic v gheuen alle mijn rijck: ende voort alle mijnen verborgen scat ende daer toe dat rijck van Persen ende van Meden Alexander ontboet hem dat hi des niet en dede: Doe ontboet Darius den coninc Porrus van Indien dat hi hem te hulpe quame tegen alexander. hi soude hem geuen ontalliken scat Als dit alexander vernam soe haeste hi hem dat hi quam ter poorten waert eer Darius te Indien voer. ende Alexander toech doer dat ijs ouer tgeberchte doer een cleyn gat Want buten en leyt ghenen wech. ende binnen den zomer en is gheen man die daer doer derf gaen om dat daer veel serpenten sijn Nochtans en isser gheen slot van
Auteursrechtvrij