Die historie dat leven ende dat regiment des alre grootsten ende machtichsten coninc alexanders die heer was ende prince alle der werelt

¶ Hoe didimus antwoerde tot die coninc alexander Capittel lxvi.

[fol. h6v]

DIdimus antwoerde hier op ende seide Alexander wi en sijn niet voerlinge van deser werelt, mer wi sijn hier al gaste want wi en bliuen hier niet gheduerich ende wi liden doer dese werelt als een pelgrim die tot sinen lande wert trecket soe ontcommert van allen dinghen, ende so licht dat ons die sonden niet en verswaren, noch gulsicheit noch ander quaetheit voer gode diemen ghenen mantel maken en mach mer wi haesten ons als onsen wech ouer leyden te gode wert mit suueren consciencien ende mit aensien dat hem niet scamen en darf Ende wi willen gheen gode sijn, noch gode afterdeel mede doen alsoe mer ghi wint tot uwer onsalicheit goods huessche ghiften Wi en sijn niet sculdich te verteren noch te begheren al dat wi sien, want dat en waer gheen besetheit noch eer Want god heeft menich dinc opter werlt gemaect om datten die werelt niet oerberlic en waer noch sonder hem niet en soude moghen staen, Mer god heuet den mensche ghegheuen die nutscap van dien dinghen die hi ghemaect heuet tot haren vryen wille die hi hem vry ghelaten heuet Ende soe wie dat hem dan mitten vrien wille hout ant beste ende laet dat

[fol. h7r]

quaet hi en waer bi god niet Mer hi verdien de goods vyantscap mede