Die historie dat leven ende dat regiment des alre grootsten ende machtichsten coninc alexanders die heer was ende prince alle der werelt

¶ Efter antwoerde alexander Capittel lxvij

ALexander screef hem weder ende seide Ic en pryse dat voer gheen salicheit dat ghi uwen lande soe seer vry hiet Want het tis beter een karker dan lant, om dat gy norghent en gaet noch en vaert in anderen landen Ende oec om dat nyemant op v en acht dit dunct ons crancke salicheit Want ghi en saeyet noch en plant boemen, noch en maket husen noch salen, ende dit dunct ons al katiuicheit Ende hier om en heeft ons gheen wonder dat ghi leeft als beesten, mer datmen reyne leeft in weelden dat is een eerlic dinc Dat ghi mit vrouwen niet veel en sijt Wie selt v moghen prysen Want uwe wiuen sijn onbequamelic, het waer scande datse menich man begheerde Mer wi ghebruken alle dat die aerde draecht, ende op bomen wast mit vryen wille om ons te wachten van sonden ende onscout te hebben Aldus so nam die tale eynde tusschen alexander ende den bracmennen: Mer alexander seide hier int eynde

[fol. h7v]

wel ende waer die alsoe dade, mer doe hi nochtan sijn tael leyde Didimus was voer ende int afterste int beste, want na sinen gheloue scinent luden der kersten gheloue ghelijc: Daer hi seit dat god twoert is, ende dat biden woerde alle dinghen ghescepen worden ende onthouden worden

¶ Hier heeft alexanders regiment eynde

.G. .L.