van dinen ghelucke ende auontueren want wi en hebben gheen dinc daer du op ons oerloghen en dorste of op ons vechten want onse goet is al ghemeen ende wi eten alle eenrehande spise, want ouer duerbaer scoen clederen daer of laten wi ons ghenoeghen mit eenre slouen Onse wiuen en blancketten hem niet dat se ons te bet ghenoeghen sellen want wijmpel cleder ende cronen dat is cierheit mer gheen scoenheit, want gheen ander scoenheit en is dan ons die natuer ghelaten heeft Wi en hebben anders gheen husen dan holen ende hageldochten, ende daer in wonen wi alsoe langhe als wi leuen Ende daer laetmen ons in legghen als wi doot sijn Wi hebben enen coninc mer dat en is daer om niet dat ons enighe rechters noot is, mer dat is alleen die edelheit Want wat is daermee ouer rechten soude daer nyemant en is die misdoet Alexander die seer wijs was, ende dit hoerde ende haer leuen vernam hi lietse vry ende quijt van allen oerlogen Ende hi screef aldus tot didimus den coninc vanden bracmannen
Auteursrechtvrij