Die historie dat leven ende dat regiment des alre grootsten ende machtichsten coninc alexanders die heer was ende prince alle der werelt

¶ Van alexanders sepulture Capit. lxi.

MEn maecte in babilonien groet gheclach ende hant gheslach van rouwen mer ic seg ouerwaer dat die dode menschen ghene vrienden en hebben Want datmen derwert dient dat is al om gewyn, want anden doden en leyt nyemant, elcs doets hem erst als of hi mach Die na alexander bleuen, die bedreuen haer dinc alsoe dat si rijc bleuen al gemeenlic, mer daer was ghestrijt een wijl om sijn sepultuer Die van gryeken wouden staphants oueruoeren tot haren lande wert mer si droeghen ouer een datmen iupiter vragen soude waermen grauen soude Iupiter antwoerde datmen alexander grauen soude tot alexandrien inder groter stat die hi seluen maken dede in egipten, dit woude doe iupiter Daer dedemen een scoen graf maken Ptolomeus seit die na hem coninc bleef, ende daer begroef hi hem eerlic alsoet sulcken heer betameliken was In alexanders tiden en vant men ghenen wiser coninc dan hi en was hadde hi hem connen wachten van veel wijns te drincken Ende hadde hem desen groten here connen houden alsoe ghemaet van sijnre

[fol. h2r]

manieren in sijnre groter rijcheit, als hi dede doe hi arm was Inder noot en conde hem nyemant beuroeden, mer in sijnre weelden soe was hi sot, want hi woude god sijn ende altoes hadde hi tot sinen rade seuen man want dat beual hem aristotiles sijn meester Mer als hem yet swaers an quam, soe nam hi elken man alleen, ende seide hem sijn dinc altemael, ende dan vraechde hi hem sinen raet Ende aldus onthilt hi wat hem elcs riet, Ende ten lesten sciep hi wt alle desen den besten raet in hem seluen, also hi beste conste ghemercken Ende dan auentuerde hi den raet Dus wort al niet sijn dinc die dus groet, so starc soe rijc, soe machtich was Want hi moste steruen ende bleef doot soe dat voer gheseit is Mer nv sel di horen hoe dat alexander tot die bracman voer